बैंकक । भारतका प्रमुख पाश्र्व गायक तथा बलिउडमा चर्चित अरिजित सिंह थाइल्याण्ड गुन्जीने भएका छन् । पाश्र्व संगीतलाई मन पराउने करोडौं संगीत पारखिहरुको ढुकढुकीकालागि रुपमा रहेको गायक अरिजितको थाइल्याण्डमा हुने कन्र्सटलाई निकै महत्वकासाथ हेरिएको छ ।
अधिकांस भारतीय हिट चलचित्रमा गीत गायका अरिजितको गायन शैलीलाई सबैले रुचाएका छन् । भारतिय गायनका सुपरस्टार अरिजित सिंह थाइल्याण्डको बैंककमा अप्रिल ६ तारिखमा बेलुकी ५ बजे इम्प्याक्ट एरिना मुआङ्थोङथानीमा गुन्जीने भएका हुन ।
हार्ट एण्ड सोल प्रोडक्सन र ग्लोबल इन्डियन इन्टरटेन्मेन्टको प्रस्तुतीमा अरिजित सिंह थाइल्याण्ड लाइभ ‘सोङ्क्रान इन बैंकक’ हुने भएको हो । कार्यक्रमकालागि टिकट विक्रि सुरुभएको छ । ‘शो’कालागि ५ हजारदेखि १५ हजार भाटसम्मको टिकट विक्रिकालागि राखिएको छ ।
अरिजितको गायन यात्रा
सिंहको सङ्गीत करियर उनका गुरु राजेन्द्र प्रसाद हजारीको प्रेणाले १८ वर्षको उमेरबाट भएको थियो । उनलाई चलचित्र निर्माता सञ्जय लीला भन्सालीले पहिलो पटक साँवरियामा “यूँ शबनमी” गीत गाउनका लागि अनुरोध गरेका थिए । तर चलचित्र निर्माणको समयमा त्यसको पटकथा फेरियो र चलचित्रमा गीतको आवश्यकता रहेन, र सोही कारण यसलाई सार्वजनिक गरिएन ।
उनको गायकीलाई देखेर टिप्स म्युजिकको प्रमुख, कुमार तौरानीले उनलाई एक एल्बमको लागि हस्ताक्षर गरेका थिए, तर त्यो पनि कहिल्यै सार्वजनिक भएन । थुप्रै रियालिटी कार्यक्रममा भाग लिदै आफुलाई अब्बल बनाउन सफल भएका थिए ।
सन् २००६ मा मुम्बई प्रवेश गरेका उनि अहिले बलिउडका सबै भन्दा चर्चित गायकका रुपमा पहिचान बनाएका छन् । सिंहले आफ्नो सुरुवाती सङ्गीत करियरमा शङ्कर–एहसान–लोय, विशाल–शेखर, मिथुन शर्मा, मोन्टी शर्मा र प्रीतम चक्रवर्ती जस्ता सङ्गीतकारहरु सँग काम गरेका छन् ।
सन् २०१० मा, सिंहले प्रीतमसँग तीन चलचित्रहरू गोलमाल ३, क्रूक र एक्सन रिप्लेमा काम गर्न सुरु गरेका थिए । सोही वर्ष उनले तेलुगु चलचित्र केडीबाट तेलुगु चलचित्र उद्योगमा सन्दीप चौटाको “नीवे ना नीवे ना” गीतसँग गायनको सुरुवात गरेका थिए । सन् २०११ मा, सिंहले मिथुनद्वारा रचित मर्डर—२ चलचित्रको गीत “फिर मोहब्बत” बाट बलिउडमा एक गायकको रूपमा सुरुवात गरेका थिए, यद्यपि उनले यसलाई सन् २००९ मा नै रेकर्ड गरेका थिए ।
उनको बर्फीमा समावेश गीत “फिर ले आया दिल”निकै चर्चित छ । अरिजीतलाई व्यापक सफलता सन् २०१३ को चलचित्र आशिकी २ बाट मिलेको थियो, जसको एल्बमको लागि उनले ६ गीत गाएका थिए । चलचित्रको शीर्षक गीत “तुम ही हो” विशेषगरी प्रसिद्ध भएको थियो, र यस गीतको लागि उनलाई धेरै पुरस्कार प्राप्त भएको थियो, जसमा सर्वश्रेष्ठ पार्श्वगायकको लागि फिल्मफेयर पुरस्कार पनि सामेल थियो ।
अरिजीतले ये जवानी है दीवानी चलचित्रको लागि “दिल्लीवाली गर्लफ्रेन्ड”, “कबीरा” र “इलाही” गीत गाएका थिए, जबकि “कबीरा” र “बलम पिचकारी” गीतहरूमा उनले सङ्गीत गरेका छन् । फटा पोस्टर निकला हिरोको “मैं रंग शर्बतों का”, र आर… राजकुमारको “धोका धडी” उनका थप चर्चित गीत हुन । उनले चेन्नई एक्सप्रेसको गीत “कश्मीर मैं तू कन्याकुमारी”मा शाहरुख खानको लागि गाएका थिए, जसलाई विशाल–शेखरले सङ्गीतबद्ध गरेका थिए ।
नीती मोहनसँग बोसको “हर किसी को”को युगल संस्करणलाई प्रस्तुत गर्नु बाहेक, सिंहले ज्याकपटको “कभी जो बादल बरसे”गीतमा शारिब–तोशीसँग र गोलियों की रासलीला राम–लीलाबाट अर्द्ध शास्त्रीय गीत, “लाल इश्क”मा सञ्जय लीला भन्सालीसँग काम गरेका थिए । पछि, सिंहले “कभी जो बादल बरसे”लाई आफ्नो व्यक्तिगत मनपर्ने गीतहरू मध्ये एकको रूपमा लिन्छन् ।
सन् २०१४ मा, सिंहलाई आफ्नो दुई मनपर्ने सङ्गीत निर्देशकहरू, साजिद–वाजिद र ए आर रहमानसँग काम गर्ने मौका मिलेको थियो । उनले साजिद–वाजिदको लागि मैं तेरा हिरोमा दुई गीत र हिरोपन्तीमा एक गीत, “रात भर” गाएका थिए, जबकि ए आर रहमानको लागि “मेधुवागथाथन”को हिन्दी संस्करण “दिल चस्पिया” शीर्षकको गीत डब गरेका थिए ।
यसको अतिरिक्त त्यो वर्ष उनले अमित त्रिवेदीको लागि “हङ्गामा हो गया”, प्रीतमको लागि यारियाँको “लभ मी थोडा और”, शारिब–तोशीको लागि हम्प्टी शर्मा की दुल्हनियाको “समझावाँ”, शङ्कर–एहसान–लोयको लागि २ स्टेट्सको “मस्त मगन”, सोहेल सेनको लागि गुन्डेको “जिया“, र अर्को प्रावो मुखर्जीको लागि हेट स्टोरी २ को “आज फिर” गीत गाएका थिए । सिंहले विशाल भारद्वाजसँग हैदरको दुई गीतहरूको रेकर्डिङ गरेका थिए र ह्याप्पी इन्डिङमा “जैसे मेरा तू”मा सचिन–जिगरसँग काम गरेका थिए ।
यस वर्ष उनले टोनी कक्कड र पलाश मुच्छल सहित धेरै अन्य सङ्गीत निर्देशकहरूसँग पनि काम गरेका छन् । उनको मधुर आवाज र असाधारण स्वर क्षमताले उनलाई भारतीय संगीत र बलिउड चलचित्रहरूको इतिहासमा सबैभन्दा कुशल र बहुमुखी गायकहरूको रूपमा स्थापित गरेको छ । हजारी भाइहरूको निर्देशनमा तीन वर्षको उमेरदेखि नै भारतीय शास्त्रीय संगीत, तबला र पप सङ्गीतको तालिम लिएका अरिजितको सांगीतिक कौशलको कुनै सीमा छैन ।
