बुटवल । बुटवल मिलनचोकको डेल्टा एजसकेसन मार्टमा बिहीबार भएको आगलागीबाट करिब ४० करोडबढी क्षति भएको छ । आगो ५ घण्टापछि नियन्त्रणमा आएको थियो ।
जिल्ला प्रहरी कार्यालय रुपन्देहीका अनुसार फलामै फलामबाट बनेको भवनको तेस्रो तलाबाट सुरु भएको आगलागी निभाउन बुटवल उपमहानगरपालिका, गौतमबुद्ध विमानस्थल, रुपन्देही, कपिलवस्तु र पश्चिम नवलपरासीका १० वटा दमकल प्रयोग गरिएको थियो ।
मार्टको तेस्रो तलामा किताब, कापीसहित स्टेशनरी सामान र खेलकुदका सामान, दोस्रो तलामा कपडा तथा स्कुल कलेजका विद्यार्थीका तयारी ड्रेस र भुईं तलामा नेपाली कम्पनीका जुत्ता र ग्रोसरी थिए ।
आगलागीबाट सबै तलाका सामान जलेर नष्ट भएको प्रहरीले जनाएको छ । मार्टको आसपासमा वस्ती र पेट्रोल पम्प समेत नजिकै भएकाले आगलागी वस्तीमा फैलिने डरले स्थानीयहरु त्रसीत भएका थिए । सो क्षेत्रमा आगलागीबाट भएको यो ठुलो क्षति मानिएको छ ।
