धरान। आगामी निर्वाचन नजिकिँदै गर्दा सुनसरी क्षेत्र नं. १ मा राजनीतिक सरगर्मी बढेको छ। यही क्रममा नेपाली काँग्रेसका उम्मेदवार सुजेन्द्र तामाङ सुशासन, भ्रष्टाचारमुक्त प्रशासन र दिगो विकासको एजेन्डासहित जनतामाझ उभिएका छन्।
लामो समयदेखि स्वास्थ्य तथा सामाजिक संस्थामार्फत जनसेवामा सक्रिय रहँदै आएका तामाङलाई स्थानीय मतदाताले क्षेत्रका समस्यासँग प्रत्यक्ष रूपमा जोडिएको उम्मेदवारका रूपमा हेर्न थालेका छन्। धरानसहित समग्र क्षेत्र नं. १ का शिक्षा, स्वास्थ्य, खानेपानी, रोजगारी र कृषि जस्ता आधारभूत मुद्दालाई उहाँले प्राथमिकतामा राख्दै आएको दाबी गरिएको छ।
तामाङको अभियानको प्रमुख विशेषता भनेको जनतासँग प्रत्यक्ष संवाद हो। उहाँ नियमित रूपमा स्थानीय बस्ती, टोल र समुदायमा पुगेर नागरिकसँग छलफल गर्ने शैलीमा विश्वास राख्नुहुन्छ। यसले मतदातामाझ पहुँचयोग्य र सुन्ने नेता भन्ने छवि बनाएको समर्थकहरूको भनाइ छ।
राजनीतिक रूपमा, उहाँलाई स्वच्छ छवि र जिम्मेवार राजनीतिमा विश्वास गर्ने नेताका रूपमा चिनिन्छ। संविधान र लोकतान्त्रिक मूल्यप्रति प्रतिबद्धता जनाउँदै उहाँले नीति, पारदर्शिता र जबाफदेहितालाई विकासको आधार मानेर अघि बढ्ने धारणा राख्दै आउनुभएको छ।
विकासको दृष्टिकोणमा तामाङले विशेष गरी
– दीर्घकालीन खानेपानी समाधान
– शिक्षा र स्वास्थ्य सेवाको पहुँच विस्तार
– कृषि र रोजगारी प्रवर्द्धन
– वन्यजन्तु संरक्षण र वातावरणीय सन्तुलन
– भौतिक पूर्वाधार विकास
जस्ता विषयलाई जोड दिँदै आउनुभएको छ।
नेपाली काँग्रेसका अनुभवी नेताका रूपमा परिचित तामाङको विजयलाई राष्ट्रिय राजनीतिसँग पनि जोडेर हेरिएको छ। उहाँका समर्थकहरूका अनुसार, देशको वर्तमान अवस्थाले खोजेको नेतृत्वका रूपमा अगाडि सारिएका गगन थापालाई प्रधानमन्त्री बनाउने दिशामा पनि सुनसरी क्षेत्र नं. १ बाट तामाङको जित महत्त्वपूर्ण हुने उनीहरूको बुझाइ छ।
यसै कारण, आगामी निर्वाचनमा सुजेन्द्र तामाङलाई अत्यधिक मतले विजयी गराउन क्षेत्र नं. १ का विवेकी मतदातामा समर्थकहरूले अपिल गरेका छन्।
संवाददाता
- शिशिर खड्का
- शिशिर खड्का
- शिशिर खड्का
- शिशिर खड्का
