एजेन्सी । जर्मनीका फुटबल लेजेण्ड फ्रान्स बेकनबाउरको ७८ वर्षको उमेरमा निधन भएको छ । उनको परिवारले जर्मन न्युज एजेन्सी डीपीएमार्फत स्टेटमेन्ट जारी गर्दै बेनबाउरको निधन भएको र त्यसबाट आफूहरु दुस्खी भएको जनाएको छ । विश्व फुटबलकै उत्कृष्ट मध्येका एक बेकनबाउरले जर्मनीबाट दुईपटक विश्वकप जितेका थिए ।
उनले सन् १९७४ मा आफ्नो कप्तानीमा पश्चिम जर्मनीबाट विश्वकप उपाधि जितेका थिए । यस्तै १९९० मा प्रशिक्षकको रुपमा विश्वकप जितेका थिए । उनी खेलाडी र प्रशिक्षक दुवै भूमिकामा विश्वकप जित्ने तीनमध्ये एक हुन् । उनी बाहेक ब्राजिलका मारियो जागोला र फ्रान्सका डिडियर डेसच्याम्पले पनि दुई भूमिकामा उपाधि जितेका थिए ।
त्यसमध्ये पहिलो जागोलोको केही दिनअघि मात्र निधन भएको थियो । बेकनबाउरले पश्चिम जर्मनीका लागि १०३ खेल खेलेका थिए । डेर केइसर’ उपनामले परिचित बेकनबाउरले सन् १९७२ मा युरो कप पनि जितेका थिए ।
यस्तै दुई पटक बालोन डे ओर पनि जितेका थिए । मुख्यगरी डिफेन्समा खेल्ने उनले जर्मन महारथी बायर्न म्युनिखका लागि ५८२ खेल खेलेका छन् र बायर्नमा पनि खेलाडी र प्रशिक्षकको रुपमा लिग जितेका थिए । बायर्न छाडेपछि बेकनबाउरले अमेरिकी क्लब न्युयोर्क कोसमोसका लागि खेलेका थिए । जहाँ नर्थ अमेरिकन सकर लिगमा ब्राजिलका पेलेसँगै उनी पोस्ट ब्वाएको रुपमा थिए ।
