पाल्पा । नेकपा एमाले पाल्पाको दशौँ जिल्ला अधिवेशनबाट अध्यक्षमा ओमबहादुर घर्तीमगर निर्वाचित हुनुभएको छ । घर्तीमगर सर्वसम्मत रुपमा निर्वाचत हुनुभएको एमालेका नेता एवम् लुम्बिनी प्रदेश सभा सदस्य खेमबहादुर सारुले जानकारी दिनुभयो ।
यस्तै, उपाध्यक्षमा विमल काफ्ले, सचिवमा भोजराज पोखरेल (रामजी), उपसचिवमा दिपक विश्वकर्मा र मीना जिसी निर्वाचित हुनुभएको छ । अध्यक्ष पदका लागि घर्तीमगर र पोखरेलको दावी रहेको थियो । तर सहमतिमा पदाधिकारी टुङ्गिएको नेताहरूले बताएका छन् ।
अध्यक्षमा निर्वाचित घर्तीमगर यसअघि एमाले जिल्ला कमिटिको सचिव र तिनाउ गाउँपालिकाको अध्यक्ष भइसक्नुभएको छ । पदाधिकारीसहित एक सय पाँच जनाको जिल्ला समिति सहमतिमै टुङ्ग्याउने प्रयास भइरहेको छ ।
निर्वाचन समितिले केही बेरमै निर्वाचित समिति घोषणा गर्ने तयारी गरेको एमालेका नेताहरूले बताउनुभएको छ ।शुक्रबारदेखि तानसेनमा जारी अधिवेशनमा चार सय पाँच बढी प्रतिनिधि सहभागी भएका थिए । अधिवेशनले सांगठनिक प्रतिवेदन पारित गरेको छ ।
पाल्पामा २००६ सालमा कम्युनिष्ट पार्टीको सेल गठन भएको थियो । लामो समयपछि २०४८ सालमा मात्रै नेकपा एमालेको पहिलो अधिवेशन भएको निवर्तमान अध्यक्ष धनेन्द्रराज घिमिरेले जानकारी दिनुभयो । अधिवेशनको उद्घाटन एमालेका महासचिव शङ्कर पोखरेलले गर्नुभएको थियो ।
