काठमाडौँ — राष्ट्रिय प्रजातन्त्र पार्टीका अध्यक्ष राजेन्द्र लिङ्देनले देश यथास्थितिमा चल्न नसक्ने भन्दै नयाँ सम्झौता गरेर अगाडि बढ्नुपर्ने बताउनुभएको छ । बुधबार प्रतिनिधिसभा बैठकमा बोल्दै अध्यक्ष लिङ्देनले देश वर्तमान अवस्थामा अडिइराख्न नसक्ने दावी गर्नुभयो ।
देशले अवलम्बन गरेको प्रणाली नै दोषी रहेको उल्लेख गर्दै यो प्रणालीबाट अपेक्षित परिवर्तन गर्न सम्भव नभएको उहाँको भनाई थियो । परिवर्तनको नाममा जे व्यवस्था निर्माण गर्नुभयो, त्यो गणतन्त्र होइन ।
अहिले जनताले के भन्छन्, लुटतन्त्र हो । केही सीमित राजनीतिक दल र ती सीमित राजनीतिक दलका पनि सीमित नेताहरूका मुठीमा देश कैद भयो । उनीहरुको लागि मात्रै भयो ।
त्यसकारण अब देश यहीँ अडिइराख्न सक्दैन, अध्यक्ष लिङ्देनले भन्नुभयो । कसैलाई निषेध गरेर मुलुक अगाडि बढ्न सक्दैन भन्नेकुरा प्रमाणित भइसकेको भन्दै अध्यक्ष लिङ्देनले नयाँ सम्झौता गरेर अगाडि बढ्नुपर्ने बताउनुभयो । विभिन्न भ्रष्टाचारका काण्डहरू आए पनि निष्पक्ष रूपमा छानबिन हुन नसकेको उहाँको भनाई छ ।
