झापामा युवतीमाथि गोली प्रहार

दमक। झापाको दमकमा एक छात्रामाथि शुक्रबार दिउँसो गोली प्रहार भएको छ । हिमालय माध्यमिक विद्यालयमा कक्षा १२ को परीक्षा दिएर फर्कँदै गरेकी १७ वर्षीया एनिका अधिकारीमाथि दमक वडा नं. ५ ज्येष्ठ नागरिक प्रतिष्ठान नजिक गोली प्रहार भएको प्रहरीले जनाएको छ ।

गोली प्रहारबाट घाइते अधिकारीको दमकस्थित लाइफलाइन अस्पतालमा उपचार भइरहेको छ ।

उदयपुर घर भई हाल दमकमा डेरा गरेर बस्दै आएकी अधिकारीको पेटमा गोली लागेको छ ।

गोली प्रहार गर्ने व्यक्तिको खोजी कार्य भइरहेको जिल्ला प्रहरी कार्यालय झापाका प्रवक्ता कृष्णकुमार चन्दले बताउनुभयो ।