काठमाडौँ। दक्षिणकाली नगरपालिका-८ केराबारीस्थित खोचमा मृत अवस्थामा भेटिएका एक पुरुष र महिलाको परिचय खुलेको छ ।
मृत भेटिनेहरुमा धादिङको सिद्धलेक गाउँपालिका-५ घर भई भक्तपुर बस्दै आएका ४२ वर्षीय रामचन्द्र खनाल र भक्तपुरको चाँगुनारायण नगरपालिक-५ कि ३२ वर्षीया सरिता राई रहेका छन् ।
नेपाल प्रहरीको विपद् व्यवस्थापन टोलीले खोचबाट उनीहरूको शव निकालेको जिल्ला प्रहरी परिसर काठमाडौंले जनाएको छ ।
बुधबार एक पुरुष र महिला मृत भेटिएको भन्दै स्थानीयले प्रहरीलाई खबर गरेका थिए । घटनास्थलमा प्रदेश ३-०२-००७ प ३८१२ नम्बरको पल्सर मोटरसाइकल समेत भेटिएको छ । जसकारण उनीहरु दुर्घटनामा परेको हुनसक्ने प्रहरीले आशंका छ ।
बुधबार साढे ४ बजेतिर प्रहरीलाई खबर आएपछि इलाका प्रहरी कार्यालय फर्पिङको टोली घटनास्थल गएर क्राइम सिन सुरक्षित राखेको थियो । त्यसपछि प्रहरी वृत्त कीर्तिपुरको टोलीले शव जाँच मुचुल्का उठाएको थियो ।
भीर तथा खोच भएका कारण बुधबार शव निकाल्न नसकेपछि बिहीबार विपद्को टोलीले शव निकालेको हो । करिब २ मिटर तलको पहराबाट शव निकालिएको प्रहरीले जनाएको छ । घटनाबारे प्रहरी वृत्त कीर्तिपुरले अनुसन्धान अघि बढाएको छ ।
