बैंकक – थाइल्याण्डमा मनोरञ्जनको लागि नाइट्रस अक्साइड (laughing gas) को बढ्दो अवैध प्रयोगलाई रोक्न सरकारले कडा निगरानी र कारबाही थालेको छ। सरकारका अनुसार मनोरञ्जन स्थलहरूमा ३.३-लिटर ट्याङ्की र क्याप्सुलको रूपमा ग्यासको बिक्री भइरहेको छ, जसले युवायुवती र पर्यटकहरूलाई आकर्षित गरिरहेको छ।
प्रधानमन्त्री कार्यालयकी उपप्रवक्ता ससिकार्न वत्तनाचनले एक विज्ञप्तिमा यस ग्यासको अत्यधिक सेवनले चक्कर आउने, वान्ता हुने, सास फेर्न गाह्रो हुने, बेहोस हुने र गम्भीर अवस्थामा मृत्यु समेत हुन सक्ने चेतावनी दिएकी छिन्।
नियमित रूपमा प्रयोग गर्दा यो ग्यासले भिटामिन B12 को कमी गराउँदै स्नायु प्रणालीमा क्षति पुर्याउन सक्छ, जसले जिउ झमझमाउने, स्नायु कमजोरी हुने र मांशपेशीहरू कमजोर बनाउने समस्या निम्त्याउन सक्छ। यद्यपि चिकित्सा, खाद्य उद्योग र अटोमोबाइल क्षेत्रमा यस ग्यासको कानूनी रूपमा प्रयोग गरिन्छ, पछिल्लो समय युवाहरू र पर्यटकहरू यसलाई सानो समयका लागि कृत्रिम नशा प्राप्त गर्न गलत तरिकाले प्रयोग गरिरहेका छन्।
थाई अधिकारीहरूले मनोरञ्जन स्थलहरूमा नाइट्रस अक्साइड भरिएका ग्यास बलुनहरू अवैध रूपमा बेच्ने विक्रेताहरूको पहिचान गरिरहेको बताएका छन्।
थाइल्याण्डको औषधि ऐन (Drugs Act) अनुसार यस ग्यासलाई बिना अनुमति बिक्री गरेमा पाँच वर्षसम्म जेल सजाय र १०,००० भाट (३९६ सिंगापुर डलर) सम्म जरिवाना हुन सक्छ। यदि ग्यासको आपूर्ति अवैध स्रोतबाट भएको पुष्टि भएमा थप तीन वर्षको जेल सजाय र/वा ५,००० भाट जरिवाना तोकिन सक्छ।
सरकारले देशव्यापी रूपमा लाफिङ ग्यासको अवैध व्यापारविरुद्ध धरपकड अभियान थालेको छ। प्रहरी प्रशासनले गलत रूपमा लेबल गरिएको नाइट्रस अक्साइड बरामद गर्दै यसको वितरण प्रणालीमाथि कडा निगरानी बढाएको छ।
अधिकारिहरूका अनुसार यो कारबाही इ-सिगरेट र अन्य अवैध लागू पदार्थ नियन्त्रण गर्ने सरकारी अभियानको हिस्सा हो। सरकारले युवायुवती र पर्यटकहरूलाई सचेत रहन आग्रह गर्दै अवैध रूपमा बेच्नेहरूमाथि कडा कानुनी कारबाही गर्ने चेतावनी दिएको छ।
न्यूजलेटर सदस्यता लिनुहोस्