काठमाडौं । जनता समाजवादी पार्टी (जसपा) नेपालका अध्यक्ष उपेन्द्र यादवले समाजवादी शक्ति निर्माणमा सबैजना लाग्नुपर्ने बताउनुभयो ।
शनिबार पार्टी केन्द्रीय कार्यालयमा आयोजित पार्टी प्रवेश कार्यक्रमलाई सम्बोधन गर्नुहुँदै अध्यक्ष यादवले उक्त कुरा बताउनुभएको हो ।
अध्यक्ष यादवले उत्पीडित नेपाली जनताको बलिदानी र सङ्घर्षले प्राप्त उपलब्धिको रक्षा गर्दै थप उपलब्धिका लागि एकताबद्ध भएर लाग्नु पर्ने बताउनुभएको पार्टीको प्रचारप्रसार तथा प्रकाशन प्रमुख पूर्ण बस्नेतले जानकारी दिनुभयो ।
मुलुकमा विद्यमान भेदभाव, अशिक्षा, गरिबी, बेरोजगारीलगायतका समस्याबाट मुक्ति दिलाउने हामी सबैको कार्यभार भएको उहाँले बताउनुभयो । उक्त अवसरमा सर्लाही हरिपुरका सुशील महराको नेतृत्वमा करिब एक सय युवा जसपा प्रवेश गरेका छन् ।
नवप्रवेशीलाई पार्टीका अध्यक्ष उपेन्द्र यादवले खादा र अबिर लगाएर पार्टी प्रवेश गराउनुभएको हो ।
पूर्व राष्ट्रिय सभा सदस्य रामपृत पासवानको पहलमा आयोजित कार्यक्रममा पार्टीका केन्द्रीय कार्यकारिणी समिति सदस्य परशुराम बस्नेतलगायतका नेताहरूको उपस्थिति रहेको थियो ।
