सुर्खेत । मध्यपश्चिम विश्वविद्यालयका नवनियुक्त उपकुलपति प्राडा केशर सिंह रानाले सरोकारवाला सबैलाई साथमा लिएर विश्वविद्यालयको हितमा काम गर्ने बताउनुभएको छ ।
आज वीरेन्द्रनगर सुर्खेत स्थित केन्द्रीय कार्यालयमा पदभार ग्रहण गर्दै रानाले विश्वविद्यालयको हितमा काम गर्ने प्रतिवद्धता जनाउनुभएको हो ।
विश्वविद्यालयका पदाधिकारी, प्राध्यापक, कर्मचारी, विद्यार्थी लगायत सरोकारवालाहरुको उपस्थितिमा पदभार ग्रहण पश्चात आयोजित कार्यक्रमलाई नवनियुक्त उपकुलपति प्रा.डा.रानाले विश्वविद्यालयको दैनिक प्रशासनिक कामकाजमा सहजता प्रदान गर्न सबैमा आग्रह गर्नुभयो ।
उहाँले विभिन्न प्राध्यापक, कर्मचारी एवं विद्यार्थी संघ, संगठनहरुद्वारा विगत ६ महिनादेखि केन्द्रीय कार्यालयमा लगाइएको तालावन्दी खोलेर गरेकोमा धन्यवाद प्रति आभार व्यक्त गर्नुभयो ।
उहाँले आफू सदैव सबैको अभिभावकका रुपमा अघि बढ्ने प्रतिवद्धता व्यक्त गर्नुभयो । रजिष्ट्रार प्रा.डा.नारायण प्रसाद पौडेलको स्वागत मन्तव्यवाट सुरु भएको कार्यक्रममा विभिन्न तहका पदाधिकारी, प्राध्यापक, कर्मचारी तथा विद्यार्थी लगायतका पेशागत संघ, संगठनले प्रतिनिधिमूलक रुपमा बधाई तथा शुभकामना व्यक्त गरेका थिए ।
नेपाल सरकारका प्रधानमन्त्री एवं विश्वविद्यालयका कुलपतिबाट यहि फागुन २४ गते राना उपकुलपतिमा नियुक्त हुनुभएको थियो ।
