बैंकक– थाई नयाँ वर्ष “सङ्क्रान पर्व” सुरु भएसँगै थाई सरकारले सवारी दुर्घटनाबाट हुने जनधनको क्षति रोक्नका लागि कडा सडक सुरक्षा अभियान सञ्चालन गरेको छ। २०२५ राष्ट्रिय सडक सुरक्षा अभियान अन्तर्गत, अप्रिल ११ देखि १७ सम्म देशभर कडाइका साथ ट्राफिक नियम कार्यान्वयन गर्ने तयारी गरिएको हो।
अभियानको नेतृत्व थाई स्वास्थ्य मन्त्रालयअन्तर्गतको सडक सुरक्षा सञ्चालन केन्द्रले गरिरहेको छ। प्रमुख जोखिमहरू जस्तै तीव्र गति, मदिरा सेवन गरेर गाडी चलाउने, लापरवाह व्यवहारलाई लक्षित गर्दै निगरानी, जाँच र कारबाहीको प्रक्रिया तीव्र बनाइएको छ।
अभियानको पहिलो दिनमै देशभर २११ वटा दुर्घटना भएका छन्, जसमा २७ जनाले ज्यान गुमाएका छन् र २०१ जना घाइते भएका छन्। रिपोर्टअनुसार, ८३ प्रतिशतभन्दा बढी दुर्घटनामा मोटरसाइकल संलग्न रहेका छन्। दुर्घटनाका प्रमुख कारण तीव्र गति, अचानक लेन परिवर्तन, र मादक पदार्थ सेवनपछि सवारी सञ्चालन रहेका छन्। अधिकांश दुर्घटना सिधा सडकमा, विशेषतः राजमार्ग र स्थानीय मार्गमा भएको जनाइएको छ।
दुर्घटनाहरू दिनको १२ बजे देखि राति ९ बजेसम्म बढी भएका छन्। मृतक तथा घाइतेमध्ये ६० देखि ६९ वर्ष उमेर समूहका व्यक्तिहरू सबैभन्दा बढी प्रभावित भएका छन्। राजधानी बैंककमा सबैभन्दा बढी मृत्यु भएको छ भने मुक्दहान प्रान्तमा सबैभन्दा बढी दुर्घटना र घाइते रिपोर्ट भएका छन्।
सुरक्षा सुनिश्चित गर्न देशभर १,७३७ चेकपोइन्टहरूमा ५०,००० भन्दा बढी अधिकारीहरू परिचालन गरिएका छन्। प्रान्तीय प्रशासनलाई ट्राफिक नियम र मदिरा बिक्रीसम्बन्धी नियम कडाइका साथ पालना गराउन निर्देशन दिइएको छ। यसबाहेक, समुदाय र परिवारमा आधारित निगरानी अभियानमार्फत जोखिमपूर्ण व्यवहार पहिचान गर्ने र समयमै रोक्ने प्रयास पनि भइरहेको छ।
लामो दूरी सार्वजनिक यातायातमा GPS ट्र्याकिङ प्रणालीमार्फत सवारीको गति र चालकको कार्यसमयको अनुगमन भइरहेको छ। प्रान्तीय यातायात कार्यालय र प्रहरी मिलेर यात्रु सुरक्षामा संलग्न छन्। सडकमा सहायता केन्द्रहरू स्थापना गरिएका छन्, जहाँ यात्रुहरूलाई सहज सेवा दिइनेछ।
थप जटिलता ल्याउँदै, अप्रिल १२ देखि १४ सम्म उत्तरी थाई क्षेत्रमा आँधी, हावाहुरी र असिना पर्ने सम्भावना रहेको मौसम विभागले जनाएको छ। चालकहरूलाई सर्तक रहन, गति कम गर्न र जोखिमयुक्त क्षेत्रहरूबाट टाढा रहन अनुरोध गरिएको छ।
थाई सरकारले सङ्क्रान पर्वको उत्सवलाई सुरक्षित बनाउन व्यापक तयारी गरेको छ। दुर्घटनाको संख्या घटाउन र नागरिकको जीवन रक्षा गर्न सरकारले चालिएका कदमहरू उल्लेखनीय छन्। सुरक्षित यात्रा र जिम्मेवार व्यवहार नै यस अभियानको मूल सन्देश हो।
न्यूजलेटर सदस्यता लिनुहोस्