भरतपुर । उपप्रधान तथा गृहमन्त्री रवि लामिछानेले श्रम र सिपका आधारमा कारागारमा रहेका कैदीहरूको कैद मिनाहाको नीति ल्याइने बताउनुभयो ।
भरतपुर कारागारको निरीक्षण गर्दै शनिबार गृहमन्त्री लामिछानेले कैदीबन्दीहरूलाई अब सिप र श्रममा दक्ष बनाइने धारणा पनि राख्नुभयो ।
कतिपय अवस्थामा आफूहरू निर्दोष हुँदाहुँदै पनि विनाकारण जेल जीवन बिताउन परेको गुनासो केही कैदीबन्दीहरुले गरेपछि त्यसको जवाफमा गृहमन्त्री लामिछानेले कोही पनि निर्दोष नफसुन् भन्ने सम्बन्धमा अनुसन्धानमा सचेत हुनुपर्ने धारणा राख्नुभयो ।
यस्तै गृहमन्त्रीले भरतपुर विमान स्थलमा पत्रकारहरुसग कुराकानी गर्दै सार्वभौम संसदमा आफूलाई बोल्न नदिएर कांग्रेसले गलत गरेको बताउनुभयो ।
सार्वभौम संसदमा आफू बोल्न पाए आफूमाथि लागेको आरोपको अनुसन्धानमा पनि सहयोग पुग्ने उहाँको दाबी छ । लामिछाने शनिबार र आइतबार चितवनमा रहनुहुने छ ।
उहाँको पार्टीको आन्तरिक कार्यक्रमसँगै उद्योगी व्यवसायीहरूसँगको अन्तर्क्रियामा समेत सहभागी हुने कार्यक्रम रहेको छ ।
