काठमाडौं । प्रधानमन्त्री पुष्पकमल दाहालले मधेश प्रदेशमा केन्द्रीय सत्ता समीकरणकै आधारमा सरकार निर्माण हुने बताउनुभएको छ ।
बिहीबार विराटनगरमा सञ्चारकर्मीहरुसँग कुरा गर्दै उहाँले केन्द्रको समीकरणभन्दा बाहिर गएर मधेश प्रदेशमा पनि अर्को सरकार नबन्ने दाबी गर्नुभयो ।
उहाँले नेकपा (एकीकृत समाजवादी) का अध्यक्ष माधवकुमार नेपाल प्रमुख प्रतिपक्ष दल नेपाली काँग्रेससहितको बैठकमा सहभागी हुनुलाई असहज रुपले नलिएको बताउनुभयो ।
उहाँले अध्यक्ष नेपाल पहिलाबाटै कहिले यता र उता जोडिने जस्तो देखिए पनि अहिलेको समीकरणभन्दा बाहिर नजानेमा स्पष्ट रहेको बताउनुभयो ।
कोशी प्रदेशलाई उसको आवश्यकता र परिस्थितिअनुसार पर्याप्त बजेटको व्यवस्था भएको छ। कोशी प्रदेशलाई बजेट कम भयो भन्ने कुरा सही नभएको भन्दै उहाँले प्रदेशको आवश्यकता र परिस्थितिअनुसार पर्याप्त बजेट विनियोजन गरेको बताउनुभयो ।
