बैंकक, १७ साउन
अब थाइल्याण्ड भ्रमणका लागि काठमाडौं नै जानुपर्ने बाध्यता हटेको छ । नेपालको पश्चिमी सहर भैरहवामा रहेको गौतम बुद्ध क्षेत्रीय अन्तर्राष्ट्रिय विमानस्थलबाट थाइल्याण्डको बैंककमा उडान हुने भएको छ ।
बैंकको थाई एयर एशियाले हप्तामा चार दिन भैरहवाबाट बैंकक तथा बैंककबाट भैरहवा उडानको अनुमति पाएको छ । नेपाल नागरिक उड्डयन प्राधिकरणले नागरिक उड्डयन प्राधिकरणले बैंकक–भैरहवा उडान गर्न अनुमति दिएको पर्यटनमन्त्री बद्री पाण्डेले जानकारी दिए ।
‘थाई एयरले काठमाडौं र भैरहवामा उडान अनुमतिका लागि आवेदन दिएको थियो,’ मन्त्री पाण्डेले भने, ‘सातामा काठमाडौंमा तीन र भैरहवामा चारवटा उडान अनुमति दिने निर्णयमा पुगेका छौं । यसले विमानस्थलको प्रयोग र पर्यटन प्रवर्द्धनमा टेवा पुर्याउनेछ ।’
हाल नेपाल एयरलाइन्स, थाई एयरलाइन्स र थाइ लाइनले काठमाडौं-बैंकक उडान भर्दै आएका छन् ।
