बैंकक। नेपाली साहित्यका अमर धरोहर आदिकवि भानुभक्त आचार्यको २११ औं जन्मजयन्तीको पावन अवसरमा साहित्य मन थाईल्याण्डले आयोजना गरेको “भानुजयन्ती विशेष कविता वाचन कार्यक्रम-२०८२” जुलाई १३, २०२५ (असार २९, २०८२) मा भव्यताका साथ सम्पन्न भएको छ। विश्वभरि छरिएर रहेका नेपालीभाषी साहित्यप्रेमीहरूलाई एउटै सूत्रमा बाँध्दै, भर्चुअल माध्यम Zoom मार्फत साँझ ७ बजे आयोजित यस कार्यक्रमले नेपाली साहित्यको महिमालाई अझ गौरवमय बनाउन सफल भएको छ।
कार्यक्रमको अध्यक्षता साहित्य मन थाईल्याण्डका अध्यक्ष ओमप्रकाश न्यौपानेले गर्नुभएको थियो भने कार्यक्रमको सञ्चालन दीपा रानाले गर्नुभएको थियो। यस महत्वपूर्ण साहित्यिक जमघटको प्रमुख आतिथ्यता नेपालका ख्यातिप्राप्त साहित्यकार युवराज नयाँघरेले गर्नुभएको थियो, उहाँले आदिकवि भानुभक्तको योगदान र नेपाली साहित्यमा उनको अतुलनीय प्रभावबारे गहन विचार व्यक्त गर्दै नेपाली साहित्यको वर्तमान र भविष्यबारे चर्चा गर्नुभयो।
कार्यक्रममा देश तथा विदेशका स्थापित एवं उदाउँदा कवि तथा साहित्यकारहरूको उत्साहजनक सहभागिता रहेको थियो। अतिथि कविहरू श्यामल अधिकारी (नेपाल), दिलिप वान्तवा (दक्षिण कोरिया), मणि पौडेल (कतार), दीपक आचार्य जलन (युएई), डा. कृष्णराज डी. सी. (नेपाल), हिमोढ पहाडी (पोर्चुगल), मनोद शर्मा (नेपाल), मनु विश्वकर्मा (नेपाल), बिना ढकाल (थाइल्याण्ड), सरु बस्नेत (नेपाल), महेश चौलागाई (नेपाल), भीमप्रसाद खनाल (बर्मा), देब घिमेरी (थाइल्याण्ड), देबी प्याकुरेल (नेपाल), शिव घिमेरी (नेपाल) जीविका अश्नु (सिक्किम, भारत), भावना खनाल (नेपाल), जुनु दिव्या राना (हङकङ) र रित निरौला गुरागाई (थाइल्याण्ड) ले आ-आफ्ना मौलिक तथा मर्मस्पर्शी कविताहरू वाचन गरी उपस्थित श्रोताहरूलाई मन्त्रमुग्ध पारेका थिए। उहाँहरूका कविताहरूमा भानुभक्तको साहित्यिक विरासतको झल्कोका साथै समसामयिक विषयवस्तु र जीवनका विविध आयामहरूलाई सुन्दर ढंगले चित्रण गरिएको थियो। उहाँहरूको प्रस्तुतिले नेपाली साहित्यको फराकिलो दायरा र भौगोलिक विविधतालाई समेत प्रतिविम्बित गरेको थियो।
कार्यक्रमको सम्पूर्ण व्यवस्थापनमा साहित्य मन थाईल्याण्डका सक्रिय सदस्यहरू दीपा राना, विना ढकाल, राज पौड्याल, डेभिड् अल्विन राउत र रविचन्द्र अधिकारी ले महत्वपूर्ण भूमिका निर्वाह गर्नुभएको थियो। उहाँहरूको अथक प्रयास र समन्वयले कार्यक्रम सफलतापूर्वक सम्पन्न गर्न मद्दत पुगेको आयोजक संस्थाले जनाएको छ।
यस कार्यक्रमका आयोजक साहित्य मन थाईल्याण्डले आदिकवि भानुभक्त आचार्यप्रति हार्दिक श्रद्धाञ्जली अर्पण गर्दै उहाँको नेपाली भाषा र साहित्यप्रतिको अतुलनीय योगदान सधैं अविस्मरणीय रहने विश्वास व्यक्त गरेको छ। संस्थाले यस्ता साहित्यिक कार्यक्रमहरूले विदेशमा रहेका नेपालीहरूलाई मातृभाषा र साहित्यसँग जोड्न, नयाँ पुस्तामा साहित्यिक चेतना अभिवृद्धि गर्न र समग्र नेपाली कला-संस्कृतिको संरक्षण तथा प्रवर्धनमा महत्वपूर्ण भूमिका खेल्ने विश्वास दोहोर्याएको छ। समग्रमा, यो कार्यक्रम विश्वभरका नेपाली साहित्यप्रेमीहरूका लागि एक अविस्मरणीय तथा प्रेरणादायी साहित्यिक जमघट बन्न सफल भएको छ।
संवाददाता
- लोकेन्द्र ओलीhttps://thailandnepal.com/author/lokendra-oli/
- लोकेन्द्र ओलीhttps://thailandnepal.com/author/lokendra-oli/
- लोकेन्द्र ओलीhttps://thailandnepal.com/author/lokendra-oli/
- लोकेन्द्र ओलीhttps://thailandnepal.com/author/lokendra-oli/
