काठमाडौं। केन्द्रीय सत्ता गठबन्धन फेरिएपछि कर्णाली प्रदेशको मूख्यमन्त्रीमा एमाले संसदीय दलका नेता यामलाल कँडेल बन्ने पक्का भएको छ ।
यसअघि सत्ता गठबन्धनमा आएको फेरबदलकै कारण सरकारको नेतृत्व गर्न नपाउनुभएका कँडेलले यस पटकको फेरबदलबाट भने अवसर पाउने पक्का भएको छ ।
कर्णाली प्रदेशमा एमालेले पहिलो पटक सरकारको नेतृत्व गर्ने भएको छ । यसअघि दुई पटक माओवादी केन्द्र र एक पटक कांग्रेसले प्रदेश सरकारको नेतृत्व गरिसकेका छन् ।
सङ्घीय सरकारको मन्त्री भइसक्नुभएका कांग्रेसका जीवनबहादुर शाही र माओवादी केन्द्रका महेन्द्रबहादुर शाहीले पहिलो कार्यकालमा नै प्रदेश सरकारको नेतृत्व गरिसक्नुभएको छ ।
यो पटक कँडेलकै नेतृत्वमा नयाँ समीकरण बन्ने पक्का भएको हो । केन्द्रीय सत्ता गठबन्धन अनुसार कर्णालीमा तीन दलीय सरकार गठन हुने छ ।
माओवादी केन्द्रका १३, एमालेका १० र एकीकृत समाजवादीका एकसहित २४ जना प्रदेश सभा सदस्य रहेका छन् ।
एमालेको नेतृत्वमा माओवादी र एकीकृत समाजवादीसहितको नयाँ सरकार गठन हुने छ ।
