थाइल्याण्डको भिसा-फ्री बसाइ अवधि ६० दिनबाट ३० दिनमा घटाइने

बैंकक – थाइल्याण्डमा भिसा-फ्री बसाइको अवधि ६० दिनबाट घटाएर ३० दिन मात्र सीमित गर्ने निर्णय भएको छ। पर्यटन तथा खेलकुद मन्त्रालयका अनुसार भिसा-फ्री योजनाको दुरुपयोग रोक्न सम्बन्धित निकायहरूले यो परिवर्तनलाई सैद्धान्तिक सहमति जनाएका छन्।

पर्यटन तथा खेलकुदमन्त्री सोरावोंग थिएनथोंगले विदेश मन्त्रालयले पछिल्ला केही सातामा सरोकारवालाहरूबीच छलफल गरी यो विषयलाई गम्भीरतापूर्वक लिएको जानकारी दिएका छन्। उनले भिसा-फ्री सुविधा प्राप्त गरेका देशका नागरिकहरूको बसाइ अवधि ६० दिनबाट घटाएर ३० दिन गर्ने सहमति भइसकेको भए पनि अझै केही थप विवरण छलफल गरी नियम परिवर्तनको औपचारिक घोषणा गरिने बताए।

सन् २०२४ को जुलाईदेखि सरकारले ९३ देशका राहदानीधारकहरूलाई थाइल्याण्डमा ६० दिनसम्म भिसा-फ्री प्रवेशको अनुमति दिएको थियो। यसअघि यो सुविधा ५७ देशका नागरिकहरूलाई मात्र प्रदान गरिएको थियो।

यद्यपि, पर्यटन व्यवसायीहरूले यो विस्तारित अवधिप्रति चिन्ता व्यक्त गरेका थिए। लामो दूरीका पर्यटकहरू औसतमा १४ देखि २१ दिन बस्ने गर्छन् भने छोटो दूरीका पर्यटकहरूको बसाइ अवधि प्रायः ७ दिनदेखि १४ दिन मात्र हुने गरेको छ।

थाइ ट्राभल एजेन्सीहरूको संघले पर्यटन मन्त्रालयलाई भिसा-फ्री अवधिको दुरुपयोग बढ्दै गएको भन्दै ध्यानाकर्षण गराएको थियो। अवैध रूपमा विदेशी नागरिकहरूले देशमा व्यवसाय सञ्चालन गर्न थालेको देखिएको छ भने थाइ होटल संघले यो समस्या गैरकानुनी रूपमा पर्यटकहरूलाई दैनिक रूपमा कन्डो भाडामा दिने प्रवृत्तिले झन् बढाएको बताएको छ।

फुकेतका एक पूर्व सांसदले हालै सरकारलाई विदेशी व्यवसायहरूको दुरुपयोग घटाउन तथा भिसा-फ्री अवधि ३० दिनमा सीमित गर्न आग्रह गरेका थिए। यो सन्दर्भमा पर्यटन मन्त्रालयकी स्थायी सचिव नत्त्रिया थावीवोंगले मन्त्रालयले पर्यटन व्यवसाय तथा मार्गदर्शक ऐनलाई थप प्रभावकारी रूपमा कार्यान्वयन गर्न निर्देशन दिएको बताइन्।

उनका अनुसार पर्यटन विभाग र पर्यटक प्रहरीले संयुक्त रूपमा फुकेत, चियाङ माई, पटाया, हुआ हिन, को सामुई र बैंकक लगायतका प्रमुख पर्यटकीय स्थानहरूमा गैरकानुनी गतिविधिहरूको निगरानी गरिरहेको छ।

सन् २०२४ मा पर्यटन विभागले ४० कम्पनीहरूको इजाजतपत्र रद्द गरिसकेको छ। ती कम्पनीहरू गैरकानुनी रूपमा निर्देशकहरूको नाम परिवर्तन तथा शेयरधारकहरूको अनुपात परिवर्तन गरेर पर्यटन व्यवसाय सञ्चालन गरिरहेका थिए।

फुकेतमा मात्र १५ वटा टुर कम्पनीहरू को इजाजतपत्र रद्द गरिएको छ। एक कम्पनीका थाइ सञ्चालक ५ फरक कम्पनीहरूको निर्देशकका रूपमा दर्ता भएको खुलासा भएपछि सो कम्पनीहरूलाई कारबाही गरिएको छ।

सरकारले गैरकानुनी रूपमा भिसा-फ्री योजनाको दुरुपयोग गरिरहेका व्यवसायहरूलाई कडा निगरानीमा राख्दै कारबाहीलाई थप कडाइ गर्ने जनाएको छ। नयाँ भिसा-फ्री नियम कहिलेदेखि लागू हुने भन्नेबारे थप औपचारिक घोषणा केही समयपछि गरिनेछ।