बैंकक- विश्व सङ्गीत दिवस २०२६ को पावन अवसर पारेर साहित्य मन थाइल्याण्डले आफ्नो नियमित अनलाइन कार्यक्रम ‘आदर्श दिव्य दर्पण’ को १९औं शृङ्खला (ब्यानर अनुसार १९औं अनलाइन शृङ्खला) भव्य रूपमा सम्पन्न गरेको छ । गत जुन २१ तारिख आइतवारका दिन आयोजित उक्त विशेष कार्यक्रममा ‘जब शब्दहरू गुञ्जिन्छन्…’ भन्ने शीर्षकमा केन्द्रित रही सम्पूर्ण माहोल सङ्गीतमय बनेको थियो ।
साहित्य मन थाइल्याण्डको आधिकारिक फेसबुक पेजबाट प्रत्यक्ष प्रसारण गरिएको यस विशेष कार्यक्रमको उद्घाटन नेपालका सुप्रसिद्ध सङ्गीतकार तथा सुमधुर स्वरका धनी साहित्य/सङ्गीतकार सन्तोष श्रेष्ठको प्रमुख आतिथ्यतामा भएको थियो । प्रमुख अतिथिको आसनबाट बोल्दै वरिष्ठ सङ्गीतकार श्रेष्ठले प्रवासमा रहेर पनि नेपाली भाषा, कला र सङ्गीतको प्रवर्द्धनमा संस्थाले खेलिरहेको भूमिकाको उच्च प्रशंसा गर्नुभयो ।
कार्यक्रममा नेपालकै प्रख्यात सङ्गीतकार तथा सङ्गीत संयोजक (Music Composer) रिदम कँडेल ज्यूले विशेष अतिथिको भूमिका निर्वाह गर्नुभएको थियो । उहाँले सङ्गीत क्षेत्रका आफ्ना विविध अनुभवहरू र मन्तव्य राख्दै आफ्ना मीठा साङ्गीतिक सिर्जनाहरू प्रस्तुत गरेर कार्यक्रमलाई थप रोचक बनाउनुभयो ।
विश्वका विभिन्न कुनाबाट जोडिएका नेपाली कलाकारहरूको बाक्लो उपस्थिति रहेको यस साङ्गीतिक साँझमा दार्जिलिङबाट आमन्त्रित अतिथि गायिका मनिषा क्षेत्री ज्यूले ‘सम्हालेर राख…’ र ‘एक फूल झरेर के भो…’ जस्ता सुमधुर गीतहरू प्रस्तुत गर्दै दमदार र उत्कृष्ट प्रस्तुति दिनुभयो । त्यसैगरी, म्यान्मारबाट जोडिनुभएकी गायिका रोमा दहाल ज्यूले ‘हेर न हेर कान्छा…’ र ‘जाँदैछु टाढा’ बोलका सुमधुर गीतहरू गाएर दर्शकहरूलाई मन्त्रमुग्ध पार्नुभएको थियो ।
आयोजक राष्ट्र थाइल्याण्डबाट गायिका ओमा गुरागाईं ज्यूले ‘भन्छन् कोही जिन्दगी यो…’ र ‘तिमीले बाटो फेर्यौ अरे…’ जस्ता मर्मस्पर्शी गीतहरू प्रस्तुत गर्नुभएको थियो भने गायिका अस्मिता न्यौपाने ज्यूले ‘यति चोखो यति मिठो…’ र पदम थापा ज्यूको लोकप्रिय गीतलाई निकै सुन्दर ढङ्गले प्रस्तुत गर्नुभएको थियो ।
यसैगरी कार्यक्रममा गायक योगेन्द्र पोयेकरले ‘गाजलु ती ठूला ठूला आँखा…’ र ‘मोहनी लाग्ला है’, गायक विजय बम्रेल ज्यूले मार्मिक आधुनिक गीत ‘मर्ने कसैलाई रहर हुँदैन’, गायक कोमल ओझाले ‘आमा’ सम्बन्धी भावुक गीत, र गायक भीमलाल खनाल ज्यूले ‘तुलसी आँगनमा रोपौँला’ जस्ता सुप्रसिद्ध गीतहरू प्रस्तुत गरेर कार्यक्रमलाई अत्यन्तै रोचक, जीवन्त र अविस्मरणीय बनाउनुभएको थियो ।
साहित्य मन थाइल्याण्डका अध्यक्ष ओमप्रकाश न्यौपाने ज्यूको अध्यक्षतामा सम्पन्न भएको उक्त कार्यक्रमको कुशल सञ्चालन रविचन्द्र अधिकारी र संस्थाकी सचिव दीपा रानाले संयुक्त रूपमा गर्नुभएको थियो ।
कार्यक्रमको अन्त्यमा सङ्गीत दिवसको अवसरमा आयोजना गरिएको यस विशेष साङ्गीतिक उत्सवलाई भव्य रूपमा सफल पार्न सहयोग गर्नुहुने प्रमुख अतिथि, विशेष अतिथि, गीत प्रस्तुत गर्नुहुने सम्पूर्ण देश-विदेशका गायक-गायिकाहरू तथा प्रत्यक्ष रूपमा जोडिएर हौसला प्रदान गर्नुहुने सम्पूर्ण आदरणीय सङ्गीतप्रेमी दर्शकहरूमा संस्थाका तर्फबाट हार्दिक धन्यवाद ज्ञापन गरिएको थियो ।
