बैंकक । थाइल्यान्डमा बसेर व्यवसाय गर्दै आइरहेका नेपाली युवा व्यवसायी लोकेन्द्र ओलीले `याेङ एचिभर´अवार्ड प्राप्त गर्नु भएको छ । ग्लोबल पार्लियामेन्टद्वारा बैंककमा आयोजित दुई दिने सम्मेलनमा रूकुम घर भएका नेपाली युवा व्यवसायी ओलीले उक्त अवार्ड प्राप्त गर्नु भएको हो ।
परदेशमा रहेर नेपालको सामाजिक सेवामा सक्रिय ओली गैरआवासीय नेपाली संघ एनआरएनएमा पनि आबद्ध हुनुहुन्छ।
बैंककस्थित सुकुम्बितमा आयोजित समारोहमा थाइल्यान्डको प्रतिनिधिसभा सांसद सुपाकोन तांगटिफाईबुँतना र डिफेन्स कमिसनका अध्यक्ष वीरोज लाखनाडिसोरान र युथ पार्लियामेन्टका अध्यक्ष दिवाकर अर्यालले ओलीलाई मेडल र प्रमाणपत्रसहित अवार्ड प्रदान गर्नुभएको थियो ।
कार्यक्रममा विभन्न देशबाट प्रतिनिधित्व गरेका युवाहरूलाई पनि अवार्ड प्रदान गरिएको थियो । ग्लोबल युथ पार्लियामेन्ट अवार्ड सन् २०१७ देखि सुरूवात भएको हो ।
यो हरेक वर्ष हुँदै आएको छ । युवा सम्मेलनमा ८२ भन्दा बढी देशका युवाहरुको सहभागिता रहेको थियो । युथ पार्लियामेन्ट युवाहरूले आफ्नो आवाज बुलन्द गर्ने प्लेटफर्म हो ।
नेतृत्व विकास, युवा सशक्तीकरण, जलवायु परिवर्तनले युवामा पारेको असरलगायत वैश्विक समस्याबारे छलफल हुने गर्छ ।
यसपटक एआई प्लेटमफर्मको विकास, जलवायु परिवर्तनले युवाहरूमा पारेको प्रभावबारे छलफल भएको अध्यक्ष दिवाकर अर्यालले जानकारी दिनुभयो।
