रुकुमपश्चिम । चौरजहारी नगरपालिका-१२, दोभानखोला नजिक भएको ट्याक्टर दुर्घटनामा एक जनाको मृत्यू भएको छ, भने ६ जना घाईते भएका छन्।
दुर्घटनामा ज्यान गुमाउने चौरजहारी नगरपालिका-१२, रुकुम पश्चिमका २६ वर्षका गोपाल केसी रहेको प्रहरीले जनाएको छ ।
दुर्घटनामा चौरजहारी नगरपालिका-१२ का १२ वर्षका कल्पना ओली, ४२ वर्षका बलु जैसी, ३२ वर्षका सरद शर्मा, वडा नं. ५ का १९ वर्षका विकास कुमाइँ र लक्ष्मण कुमाइँ, वडा नं. ११ का ८ वर्षका विकास डाङ्गी घाईते भएको प्रहरीले जनाएको हो । घाइतेहरू पाँच जनाको चौरजहारी मिसन अस्पतालमा उपचार सम्भव नभएपछि नेपालगञ्ज रिफर गरिएको छ ।
घाइते भएका चालक लक्ष्मण कुमाइँको चौरजहारी अस्पतालमा उपचार भइरहेको छ ।
घाइतेहरूलाई चौरजहारी नगरपालिकाको दुई वटा एम्वुलेन्स र स्कारपियोमा थप उपचारका लागि नेपालगञ्ज पठाइएको चौरजहारी नगरपालिका निमित्त प्रमुख प्रशासकीय अधिकृत शेर प्रसाद ढकालले जानकारी दिनुभयो ।
कर्णाली प्रदेश ०३००१ त ००१ नम्बरको ट्याक्टर बिहान ९:०० बजे दुर्घटनामा परेको थियो।
