काठमाडौं । नेपाली कांग्रेसले बारामा पारिश्रमिक नपाएर आन्दोलनरत शिक्षकहरुको आन्दोलनमा प्रहरी हस्तक्षेप भएकोप्रति भर्त्सना गरेको छ । प्रहरीको निर्मम दमन र गोली प्रहारबाट एक जनाको मृत्युसमेत भएको भन्दै कांग्रेसले मृतकका परिवारलाई क्षतिपूर्ति दिन र घाइतेहरुको निःशुल्क उपचारको व्यवस्था गर्न समेत सरकारसँग माग गरेको छ ।
बाराको सिम्रौनगढ नगरपालिकाका ३२ वटा सामुदायिक तथा धार्मिक विद्यालयका १९० जना शिक्षकहरुले छ महिनादेखि पारिश्रमिक नपाएपछि नगरपालिका अगाडि दुई महिनादेखि शान्तपूर्ण आन्दोलन गर्दै आएका थिए । तर बुधबार उनीहरुको आन्दोलनमा प्रहरी हस्तक्षेप हुँदा तनाव उत्पन्न भएको थियो । त्यसक्रममा प्रहरीले गोली चलाउँदा सिम्रौनगढ नगरपालिका १ का लक्ष्मीमुखिया बिनको ज्यान गएको थियो भने केही आन्दोलनकारीहरु घाइते भएका छन् ।
कांग्रेस केन्द्रीय कार्यालयका मुख्यसचिव कृष्णप्रसाद पौडेलले शान्तिपूर्ण धर्नामा बसेका शिक्षकहरुमाथि प्रहरीले अनावश्यक हस्तक्षेप गरेको भन्दै घोर निन्दा र भर्त्सना गरेका छन् । घटनाको यथार्थ छानबिन गरी दोषीलाई कडाभन्दा कडा कारबाही गर्न, मृतकको परिवारलाई क्षतिपूर्ति तथा घाइतेहरुको निःशुल्क उपचारको व्यवस्था गर्न नेपाली कांग्रेस सरकारसँग माग गर्दछ,पौडेलले विज्ञप्तिमार्फत भनेका छन् ।
