काठमाडौँ — प्रतिनिधिसभाको बैठक सांसद मन्जु शर्मा अन्सारीको निधनमा शोक प्रस्ताव पारित गरेर स्थगित भएको छ । प्रतिनिधिसभाको आइतबार ११ बजेर ४८ मिनेटमा बसेको बैठकले सांसद शर्माको निधनमा शोक प्रस्ताव पारित गरेको हो । सांसद शर्माको आइतबार बिहान निधन भएको हो ।
उपचारको क्रममा मिनभवनस्थित सिभिल अस्पतालमा उहाँको निधन भएको हो । २०२० माघ १९ गते जन्मिएकी अन्सारी २०७९ चैत १९ गते प्रतिनिधिसभा सदस्य निर्वाचित हुनुभएको थियो ।
जसपाबाट समानुपातिक निर्वाचन प्रणालीबाट प्रतिनिधिसभा सदस्य पदमा निर्वाचित शहनाज रहमानको २०७९ फागुन १३ गते निधन भएपछि रिक्त रहेको स्थानमा उहाँ निर्वाचित हुनुभएको थियो ।
२०४६ सालको आन्दोलन देखि राजनीतिक यात्रा सुरुवात गर्नुभएकी उहाँ सद्भावना पार्टीमा आबद्ध भई २०४६ साल देखि २०५६ सम्म उपत्यका महिला इन्चार्ज बन्नु भएको थियो ।
उहाँ हाल जनता समाजवादी पार्टी, नेपालको केन्द्रीय सदस्य हुनुहुन्थ्यो । सभामुख देवराज घिमिरेले सिभिल अस्पतालमा गएर शोक व्यक्त गर्नुभएको थियो । प्रतिनिधिसभा बैठक सोमबार ११ बजेसम्मका लागि स्थगित गरिएको छ ।
