दाङ। सरकारका प्रवक्ता तथा सूचना प्रविधि मन्त्री रेखा शर्माले आमसंचार माध्यमहरूले भोग्नु परेको आर्थिक समस्या समाधान हुने प्रतिक्रिया दिनु भएको छ ।
देशको बदलिँदो आर्थिक परिस्थितीका बीच सञ्चारमाध्यमको अबस्था दयनीय बन्दै गएको भन्दै यसलाई सरकारले ल्याउने मिडिया विधेयकले समाधान गर्ने बताउनु भयो ।
उहाँले आमसञ्चार माध्यमको संकटलाई अत्य गर्न बनेको विधेयक कार्यान्वयनमा आए केही हदसम्म समस्या समाधान हुने भनाई थियो ।
दाङमा आजबाट सुरु भएको दुईदिने मिडिया महोत्सव तथा २२ औँ साधारण सभा र १२ औँ अधिवेशनमा आफ्नो भनाई राख्दै मन्त्री शर्माले बिभिन्न कानून कार्यान्वयनमा आए कुनै पनि मिडियाले आर्थिक भार खेप्नु नपर्ने दाबी गर्नुभयो ।
उहाँले मूलधारका मिडियालाई नयाँ मिडियाले चुनौती दिई रहेको भन्दै यस्ता कार्यमा गम्भीर भएर लाग्न आग्रह गर्नु भयो । उहाँले बदलिँदो डिजिटल पत्रकारितालाई आत्मसाथ गर्दै सुधारिएको पत्रकारितामा जोड दिनु भयो ।
अहिले सञ्चार क्षेत्र र सञ्चारकर्मीहरुको विकासका लागि राज्यले केही गरेन भन्ने जनगुनासो बढ्दो रहेको भन्दै त्यसका लागि आफू गम्भीर हुने बताउनु भयो ।
