काठमाडौं । प्रधानमन्त्री पुष्पकमल दाहाल ‘प्रचण्ड’ माघ ५ गते युगाण्डा जानुहुने भएको छ । मंगलबार बसेको मन्त्रिपरिषद्को निर्णय बुधबार सार्वजनिक गर्नुहुँदै सञ्चार तथा सूचना प्रविधिमन्त्री एवम् सरकारका प्रवक्ता रेखा शर्माले यसबारेमा जानकारी गराउनुभएको हो ।
प्रवक्ता शर्माका अनुसार प्रधानमन्त्री प्रचण्डले युगाण्डाको राजधानी कम्पालामा माघ ५-६ मा आयोजना हुने असंलग्न आन्दोलनका सदस्य राष्ट्रहरूको १९ औँ सम्मेलनमा भाग लिनुहुनेछ । सो अघि ३-४ मा हुने असंलग्न आन्दोलनका सदस्य राष्ट्रहरूको मन्त्रिस्तरीय बैठकमा परराष्ट्रमन्त्री नारायणप्रकाश साउद र माघ १-२ मा हुने पदाधिकारी बैठकमा परराष्ट्र सचिवको नेतृत्वमा नेपाली प्रतिनिधि मण्डल गठन गर्ने निर्णय भएको छ ।
सरकारले एनसेलको शेयर खरिद बिक्री सम्बन्धमा गठित छानबिन समितिको म्याद माघ १५ गतेसम्म थप गरेको छ। पुस २४ गतेको मन्त्रिपरिषद् बैठकले छानबिन समितिको म्याद थप गर्ने निर्णय गरेको हो । सञ्चार तथा सूचना प्रविधिमन्त्री एवम् सरकारका प्रवक्ता शर्माका अनुसार मङ्सिर २१ गतेको निर्णय अनुसार गठन भएको समितिको म्याद माघ १५ गतेसम्म थप गर्ने निर्णय भएको हो ।
