काठमाडौं । बागमती प्रदेश सरकारले प्रदेशको आन्तरिक मामिला तथा कानुन मन्त्रालयमार्फत बागमती प्रदेशभित्रका प्रहरी एकाईहरुको भवन निर्माण गर्न साढे २६ करोड रुपियाँभन्दा बढी बजेट दिएको छ ।
बागमती प्रदेशका आन्तरिक मामिला तथा कानुनमन्त्री एवं प्रदेश सरकारमा प्रवक्ता गङ्गानारायण श्रेष्ठले सोमबार हेटौँडामा मन्त्रालयले चालु आर्थिक वर्ष २०८०-०८१ को हालसम्म गरेका गतिविधि र कार्यसम्पादन बारेमा जानकारी दिन आयोजित सञ्चारकर्मीहरुसँग साक्षात्कार कार्यक्रममा प्रहरीको सेवा प्रभावकारी बनाउन पूर्वाधार निर्माणलगायतका सहयोग गर्दै आएको बताउनुभयो ।
उहाँले मन्त्रालयमार्फत चालु आर्थिक वर्ष २०८०-०८१ का लागि प्रदेशभित्रका १९ वटा क्रमागत र पाँचवटा नयाँ प्रहरी एकाई भवनको बहुवर्षीय सुनिश्चितापछि भवन निर्माणका लागि २६ करोड ५५ लाख रुपियाँ खर्च गर्ने गरी बागमती प्रदेश प्रहरी कार्यालय मातहतका प्रहरी एकाईहरुलाई अख्तियारी प्रदान गरिएको जानकारी दिनुभयो ।
