बैंकक– अन्तर्राष्ट्रिय मजदुर दिवस २०२६ को सुअवसरमा साहित्य मन थाइल्याण्डले ‘श्रम र सिर्जना’ विषयको एक विशेष साहित्यिक कार्यक्रम भव्य रूपमा सम्पन्न गरेको छ। संस्थाले नियमित रूपमा सञ्चालन गर्दै आइरहेको ‘आदर्श दिव्य दर्पण’को १५औँ शृङ्खलालाई यस पटक श्रमिकहरूको सम्मान र उनीहरूको योगदानलाई साहित्यमार्फत उजागर गर्न समर्पित गरिएको हो।
साहित्यकार विनोद नेपालको विशेष आतिथ्यमा आयोजित उक्त कार्यक्रममा श्रमको गरिमा र सिर्जनात्मक शक्तिको गहिरो सम्बन्धमाथि विमर्श गरिएको थियो। कार्यक्रमलाई सम्बोधन गर्दै प्रमुख अतिथि नेपालले श्रमिकका हातहरू केवल श्रमका प्रतीक मात्र नभएर सभ्यताका वास्तविक निर्माता र पसिनाद्वारा जीवनको महाकाव्य लेख्ने मौन कवि भएको धारणा राख्नुभयो। उहाँले श्रमिकका पीडा र अनुभवको अभिव्यक्तिले नै समाजको दृष्टिकोण र चेतना परिवर्तन गर्न सक्ने बताउँदै सिर्जनालाई केवल कलाका रूपमा मात्र नलिई अन्याय विरुद्धको आवाज र मानवताको पक्षमा उभिने एउटा महत्त्वपूर्ण जिम्मेवारीका रूपमा व्याख्या गर्नुभयो। जुनसुकै परिवेश र बाध्यतामा रहेका श्रमिकहरूको सम्मान गर्नु सबैको दायित्व भएकोमा उहाँको विशेष जोड थियो।
सो साहित्यिक गोष्ठीमा विभिन्न स्रष्टाहरूले श्रमिकको जीवन, राष्ट्रियता र मानवीय संवेदना समेटिएका रचनाहरू प्रस्तुत गर्नुभएको थियो। स्रष्टा छविलाल कोपिलाले ‘पसिनाको सुगन्ध’ र ‘फलाम र सुन’ जस्ता प्रभावकारी कविता वाचन गर्नुभयो भने राधा गौतमले ‘हातमा घाउ मनमा सपना’ र ‘एकदिनको छुट्टी’ मार्फत श्रमिकका व्यथा पोख्नुभयो। धिरज प्रताप मल्ल ठकुरीले ‘आस्थाको ईश्वर’ र ‘एक पागल मानिस’ तथा निमबहादुर थापाले ‘म तिमीलाई देश देखाउँछु’ र ‘राजमार्ग’ कवितामार्फत वैचारिक चेतना प्रस्तुत गर्नुभयो।
त्यसैगरी, शङ्कर घर्तीमगरले आफ्ना चोटिला गजलहरू मार्फत कार्यक्रममा रौनक थप्नुभयो भने श्रुति सेजलले ‘श्रमको मूल्य’ र ‘देश बिक्रीमा छ’ जस्ता समसामयिक विषयका कविता सुनाउनुभयो। ध्रुव अर्याल निरसले ‘बुद्ध र शान्ति’ कविता वाचन गर्नुभएको सो कार्यक्रममा थाइल्याण्डबाट रविचन्द्र अधिकारीले ‘जीवन’, भीमलाल खनालले ‘समयको पदचाप’ र राज पौड्यालले गजलमार्फत श्रम र जीवनको दर्शन प्रस्तुत गर्नुभयो।
साहित्य मन थाइल्याण्डका अध्यक्ष ओमप्रकाश न्यौपानेको अध्यक्षतामा सम्पन्न भएको उक्त गरिमामय कार्यक्रमको सहज सञ्चालन संस्थाकी सचिव दीपा रानाले गर्नुभएको थियो। कार्यक्रमले प्रवासमा रहेर पनि नेपाली भाषा, साहित्य र श्रमिकको मुद्दालाई जोड्ने कार्यमा महत्त्वपूर्ण भूमिका खेलेको सहभागीहरूले उल्लेख गरे।
